Wasiiro uu Ra’iisul Wasaaraha u xilsaaray abaaraha ka jirta Jubbaland oo la kulmay Madaxweynaha Jubbaland

Wefdi Wasiirro ah oo uu Ra’iisul Wasaare Maxamed Xuseen Rooble u saaray arrinta abaaraha ka jira Jubbaland ayaa maanta gaaray magaalada Kismaayo.

Wafdiga oo u kuurgalaya xaaladda abaarta ayaa la kulmay Madaxweynaha Jubbaland Axmed Maxamed Islaam iyo guddiga abaaraha ee Jubbaland, oo ay ka dhageysteen warbixin ku saabsan heerka iyo saameynta abaartu ku yeelatay deegaannada Jubbaland.

Wefdiga ayaa sidoo kale dowlad-goboleedka Jubbaland gaarsiiyay deeq dawo ah oo hordhac u ah gurmadka dowladdu ka geysaneyso caawinta dadka ay abaaruhu saameeyeen.

Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble ayaa shacabka Soomaaliyeed ugu baaqay in ay kaalin ka qaataan gurmadka walaalahood, isagoo hay’adaha gargaarka iyo beesha caalamkana ugu yeeray in ay deg deg ugu gurmadaan dadka abaaruhu aafeeyeen ee ku nool Jubbaland iyo deegaanno kale oo dalka ah.