Puntland ayaa ku jirta marxalad doorasho oo maalmo uun ay ka dhiman yihiin waqtiga ay ku egtahay dowladda, kuna beegan 8 Janaayo 2024-ka.

Beelaha kala duwan ee daga deegaanadaasi ayaa odayaashooda dhaqanku waxay wadaan soo saarista liiska xildhibaanada 6aad ee golaha wakiilada Puntland.

Maxamed Cabdiqaadir Cismaan oo xoghaye ka soo noqday guddiyadii xalinta khilaafaadka ee labada doorasho sanadihii 2013-kii ilaa 2018-kii ayaa BBC-da u sheegay in isbadallo ku dhaceen meelaha qaar marka laga hadlayo xulista xildhibaannada, laakinse wali isimo dhaqanka ee lahaa asaaskii Puntland sanadkii 1998-dii ay yihiin saxiixayaasha xildhibaanada baarlamaanka.

Laakinse maadaama aynaan dhamaantood soo wada koobi karin, ayaan isimada hoos magacyadoodu ku xusan yihiin soo qaadannay, kuwaasoo leh saxiixa tirada ugu badan ee xildhibaanada Barlamaanka Puntland.

Boqor Burhaan Boqor Muuse- Gobolka Bari

Boqor Burhaan Boqor Muuse oo ka mid ah isimada dhaqanka ee gobolka Bari ayaa leh saxiixa ugu danbeeya ee saddexda xubnood ee ka soo baxa beeshiisa.

Sida u dhigan xeerka waxaa ka mid ah in reerka xilligaas leh ay nabadoonkooda iyo cuqaashoodu soo dhirin dhiriyaan ka dibna uu aakhirkii guddiga xalinta Khilaafaadka u gudbiyo saxiixa Boqorka.

Beeldaaje Maxamed Beeldaaje Ismaaciil-Gobolka Bari

Beeldaaje Maxamed Beeldaaje Ismaaciil ayaa leh saxiixa ugu danbeeya ee saddexda xildhibaan ee beeshiisa kuwas oo ka mid noqda barlamaanka Puntland

Sida u dhigan xeerka beelaha waxaa ka mid ah in reerka xiligaas leh ay nabadoonkooda iyo cuqaashooda soo dhirin dhiriyaan ka dibna uu aakhirkii guddiga xalinta Khilaafaadka u gudbiyo saxiixa Boqorka.

Suldaan Siciid Suldaan Cabdisalaan – Gobolka Sanaag

Suldaan Siciid Suldaan Cabdisalaan ayaa liiska hore kaga jira isimada Putland ee leh saxiixa tirada ugu badan ee xildhibaanada gobolka Sanaag.

Suldaanka ayaa saxiixa sagaalka xildhibaan ee gobolkaas ku leeyahay baarlamaanka Puntland, laakin marar kala duwan waxaa sidoo kale xubno ka mid ah sagaalkaas saxiixay Suldaan Maxamed Suldaan Cabdillaahi.

Mar la eego Salaadiintu waxay leeyihiin saxiixa u gudbaya guddiga xalinta khilaafaadka hase yeeshee, waxaa jira cuqaal iyo nabadoonno door muhi im ah ku leh xulista xildhibaannada.

Ugaas Xasan Ugaas Yaasiin-Gobolka Bari

Ugaas xasan Ugaas Yaasiin waxaa uu saxiixa ugu danbaynta ah ku leeyahay saddex xildhibaan oo beeshiisa ku matalaya barlamaanka Puntland.

Ugaaska ayaa si la mid ah sida isimada kale wuxuu leeyahay leh saxiixa u gudbaya guddiga xalinta khilaafaadka Puntland.

Cuqaasha iyo Nabadoonada beeshaas ayaa sidoo kale leh door ku leh xulidda xildhibaannada.

Beeldaaje Cali Faarax- Gobolka Bari

Beeldaaje Cali Faarax ayaa ah mid ka mid ah Isimada ka nool odayaashii dhaqanka ee saxiixay xildhibaanadii ugu horeyey ee barlamaanka Puntland sanadkii 1998-dii

Beeldaaje Cali ayaa leh saxiixa kama danbaysta ah ee labada xildhibaan ee beeshiisu ku leedahay baarlamaanka Puntland ee loo gudbinayo guddiga xallinta khilaafaadka.

Cuqaasha iyo nabadoonada ayaa iyagana leh door muhiim ah marka laga hadlayo xulidda xildhibaanada.

Beeldaaje Ismaaciil Beeldaaje Yaasiin–+ Gobolka Bari.

Beeldaaje Ismaaciil Beeldaje Yaasiin ayaa leh saxiisa u gudbaya guddiga xalinta khilaafaadka ee labada kursi xildhibaan ee beeshiisu ku leedahay barlamaanka Puntland

Nabadoonada iyo cuqaasha ayaa sidoo kale leh door muhiima oo xulidda xildhibaanada ah

• Labada nin ee hogaamiya mucaaradka Puntland2 Juunyo 2023
• Laba arrin oo la sheegay in Soomaaliya ku badalatay kursigii gabadhaan looga guuleystay27 Oktoobar 2023
• Waa kuwee Laacibiinta cayaaraha looga joojiyey dagaalka Xamaas-Israa’iil dartiis19 Oktoobar 2023

Islaan Ciise Islaan Maxamed – Gobolka Nugaal

Islaan Ciise Islaan Maxamed ayaa leh saxiixa toddobo ka mid ah sagaalka xubnood ee Nugaal ku matelaya barlamaanka Puntland.

Islaan Ciise ayaa ka mida Isimada saxiixa tirada ugu badan ee xildhibaanada barlamaanka oo saxiixooda u gudbo guddiga xalinta Khilaafaadka

Cuqaasha iyo nabadoonada ayaa islaanka kala shaqeeya soo xulida xildhibaanada.

Islaan Bashiir Islaan Cabdille- Gobolka Mudug

Islaan Bashiir Islaan Cabdille ayaa leh saxiixa kama danbaysta ah ee labo xubnood oo ka yimaada Mudug.

Wuxuu kaloo Islaan Bashiir leeyahay saxiixa labo xubnood oo ka yimaada gobolka Nugaal kuwaas oo beeshiisu ku leedahay barlamaanka Puntland, saxiixiisa ayaana ah kan u gudba guddiga khilaafaadka.

Islaanka ayaa sidoo kala ka mid noqonaya isimada leh saxiixa tirada ugu badan ee xildhibaannada baarlamanka Puntland.

Ugaas Cali Ugaas Maxamed – Goldogob, Mudug.

Ugaas Cali oo ka soo jeeda magaalada ku taalla galbeedka Mudug ayaa leh saxiixa ugu dambeeya 2 xildhibaan oo deegaankiisa ah, kuwaasoo ka mid ah baarlamaanka Puntland.

Sool iyo Cayn

Gobolada Sool iyo Cayn ayey ka imaan jireen tirada ugu badan ee xildhibaano beel ku leedahay barlmaanka Puntland kuwaas oo ah 17 xildhibaan. Kuwii ugu dambeeyey ee baarlamaanka 5aad ee Puntland waxaa saxiixay isimada magacyadoodu hoos ku yaallaan.

AUN Garaad Saleebaan Garaad Maxamed

AUN Garaad Cali Buraale Xasan

AUN Ugaas Maxamuud Ugaas Cabdilaahi Ciise

AUN Jiif Caaqil Axmed Hoolif

Jiif-caaqil C/kariin Axmed saleebaan Mursal

Iyo garaado kale oo lahaa saxiixa ugu danbeeya ee loo gudbiyo guddiga xalinta khilaafaaadka.

Waxaa xusid mudan in aysaan inta aan daabacnay ahayn odayaasha dhaqanka ee saxiixa xildhibaanada baarlamaanka Puntland, hase ahaatee waxaa jira kuwo badan oo aan qoraalkeena ka soo muuqan magacyadooda sababo la xiriira koobida warbixinta.

Xogta ku saabsan arrinta magacyada Isimadii saxiixa ugu danbeeya lahaa qaar waxay BBC-du ka xigatay warqadii ay soo saareen guddigii xallinta khilaafaadka baarlamaanka sanadkii 2018-kii 31 bishii December

Sida uu BBC-da u sheegay Maxamed Cabdiqaadir oo xoghayn ka soo noqday laba xilli guddiga xallinta khilaafaadka ee Puntland, waxaa jira isimo lahaa saxiixa oo siyaabo kala duwan aan u saxiixin iyo khilaafaadyo ka taagnaa saxiixa.

“Waxaa mararka qaar intii aan ku jiray guddigaas dhacayey khilaafaadyo dhaqanka u dhaxeeya iyo kuwo siyaasado is diidan ay riixayaan oo dhibaato ku ahaa howlaha liiska xildhibaanada dhamaadkii sanadihii 2013 ilaa 2018” ayuu Yiri Maxamed.