Shirka Golaha Wadatashiga Qaran ee madaxda Soomaaliya ayaa maanta ka furmay madaxtooyada Villa Somalia ee magaalada Muqdisho.

Shirka oo uu guddoominayo Madaxweynaha Soomaaliya Xasan Sheekh Maxamuud ayaa waxaa ka qeyb-galaya Ra’iisul Wasaare Xamse Cabdi Barre iyo ku-xigeenkiisa Saalax Axmed Jaamac, iyo Madaxweyneyaasha dowlad-goboleedyada Puntland, Siciid Cabdullaahi Deni, Koonfur-galbeed Cabdicasiis Xasan Maxamed, Jubaland Axmed Maxamed Islaam, HirShabeelle Cali Cabdullaahi Xuseen, Galmudug Axmed Cabdi Kaariye iyo Gudoomiyaha Gobolka Benaadir Yuusuf Xuseen Jimcaale.

Shirkan qodobada ugu muhimsan ee looga hadlayo waxaa ka mid ah dagaalka ka dhanka Al-Shabaab iyo sidii maamul goboleedyada oo dhan ay uga wada qeyb qaadan lahaayeen, xalinta madmadow ku xeeran arrimaha shidaalka Soomaaliya, iyo gurmadka abaaraha.

Dagaalkan ayaa xooggiisa ka socda deegaanada maamul goboleedka HirShabeelle, balse waxaa yar dhaq-dhaqaaqyada maamul goboleedyada kale, waxaana jira isku day lagu ballaarinayo.